Namnet vårt fortel kva vi byr deg – ekte Naturopplevingar

Hei frå fjellheimen, vi er Tea og Kjell. Firmaet vårt Naturopplevingar heldt til i Lom og Skjåk – to bygdeperler krinsa av nokre av dei flottaste fjella og fjordane Noreg byr på. Vi tilbyr utleie av friluftslivutstyr og skreddersyr naturopplevingar for små og store grupper.

I Naturopplevingar finn du oss, syskjenbåna Tea Karoline Mork og Kjell Lundemo. Båe er vi frå Skjåk, og båe er vi lidenskapeleg opptekne av å vere ute i naturen. Med Naturopplevingar ynskjer vi å formidle turgleda fjellheimen gir oss som menneske, og dele opplevingar som set seg i kropp og sinn med deg.

For oss er dette det mest meiningsfylte og givande vi gjer. Det aller likaste vi veit er å ha med oss folk på tur. Å vere i naturen, spesielt med born og unge, gir ei eigen ro som berre må opplevast. Vi nytter kvart einaste høve til å kome oss ut på sykkel, randonnéeski, topptur, fisketur eller kva som helst anna, så lenge vi får puste inn det beste som er – fjelluft.